Қазақстандық инвестордың 2024 жылғы 1 мамырдағы портреті, деп хабарлайды DKNews.kz.
Орталық депозитарийдің номиналды ұстау жүйесіндегі (KCSD) брокерлік шоттардың жалпы саны 2024 жылғы 1 мамырдағы жағдай бойынша 2 801 924-ке жетті, оның ішінде 708 860 шот ұстаушылардың қосалқы шоттарына және 2 093 070 шот Орталық депозитарийдегі омнибус-шоттар (бұл клиент активтерінің жиынтық есебін жүргізуге мүмкіндік беретін шоттың ерекше түрі) арқылы есепке алынатын ұстаушылардың брокерлік шоттарына тиесілі.
2024 жылдың сәуірінде Орталық депозитарийдің номиналды ұстау жүйесіндегі шоттардың жалпы саны 11 000-ға өсті.
Төменде KCSD есепке алу жүйесінде тікелей ашылған қосалқы шоттар туралы деректер негізінде жасалған қазақстандық инвестордың портреті берілген. Қаржы құралдары омнибус-шоттарда есепке алынатын инвесторлар туралы ақпарат Қазақстан Республикасы заңнамасының талаптарына сәйкес жария етілмейді.
Инвесторлардың гендерлік бөлінуі бұрын қалыптасқан үрдістерді сақтауды жалғастыруда: әйел инвесторлардың үлесі 49,8% деңгейінде сақталды, ал ер инвесторлардың үлесі әлі де 50,2 % құрайды. Бұл тұрақты теңгерім 2023 жылдың сәуірінен бастап жалғасуда.
Инвесторлардың ең көп саны әлі де 35 пен 54 жас аралығындағы топ болып табылады, ол мамыр айында инвесторлардың жалпы санының 39% құрады. Осы айда осы топтағы инвесторлар санының шамалы өсуі байқалады.
Инвесторлар құрылымында екінші орынды 25 пен 34 жас аралығындағы адамдар алады. Осы айда олардың үлесі өзгерген жоқ, бұл әлі де инвесторлардың жалпы санының 31,5% құрайды.
Үшінші орында 18 бен 24 жас аралығындағы инвесторлар тұр, олардың үлесі 15,1% құрады. Аумақтық бөлініс бойынша көшбасшылықты дәстүрлі түрде Алматы (20,7 %) және Астана (11,2%) сақтап қалды.
Үшінші орында Түркістан облысы (9,1%) тұр, ол 2022 жылдың наурыз айынан бастап өз позициясын сақтап келеді.
Инвесторлардың ең аз саны Солтүстік Қазақстан облысында тұрады, онда қосалқы шоттар саны Қазақстан бойынша инвесторлардың жалпы санының 1,7% ғана құрайды.