2026 жылғы 12–18 қазанда Бангкок қаласында (Таиланд) Халықаралық валюта қоры мен Дүниежүзілік банк тобының Жыл сайынғы кездесулері шеңберінде Қазақстан делегациясы жетекші халықаралық қаржы институттарымен және инвесторлармен бірқатар кездесу өткізді. Кездесуге Қазақстанның Бағалы қағаздар орталық депозитарийі (KCSD) де қатысты.

Кездесу аясында Қазақстандағы экономикалық ахуалды талқылаумен қатар, капитал нарығын реформалау және одан әрі дамыту, оның инфрақұрылымын жаңғырту, сондай-ақ шетелдік инвесторлардың Қазақстанның бағалы қағаздарына қол жеткізу мүмкіндіктерін кеңейту жоспарларына ерекше назар аударылды. Халықаралық Clearstream және Euroclear депозитарийлерімен өткен негізгі кездесулер барысында KCSD-мен тікелей байланыстарды дамыту перспективалары, ал J.P. Morgan компаниясымен өткен жеке кездесуде Қазақстанның мемлекеттік бағалы қағаздарын дамушы нарықтардың GBI-EM индексіне қосу перспективалары талқыланды. 

Сондай-ақ халықаралық әріптестерге Қазақстанның капитал нарығы бойынша статистиканы, бағалы қағаздар туралы деректерді, жаңалықтарды, заңнаманы және талдамалық материалдарды қоса алғанда, нарық туралы негізгі ақпаратты біріктіретін бірыңғай ақпараттық портал құру жоспарлары таныстырылды.

"Халықаралық байланыстарды дамыту, инфрақұрылымды жаңғырту және нарықтың ашықтығын арттыру жаһандық инвесторлардың қатысу аясын кеңейтуге және Қазақстанның халықаралық қаржы жүйесіне одан әрі интеграциялануына жағдай жасайды", – деп атап өтті KCSD Басқармасының төрағасы Иван Сердюк.

Кездесулер капитал нарығының қолжетімділігі мен тартымдылығын арттыру үшін нарықтық инфрақұрылымды жүйелі түрде дамыту және халықаралық әріптестермен өзара іс-қимылды нығайтудың маңыздылығын растады.